पोखरा, माघ २४ गते । कथाकार लक्ष्मण वियोगीको कथा सङ्ग्रह सत्यम्माथि पोखरामा शनिवार चर्चा गरिएको छ ।
र्यान्डम रिडर्स सोसाइटीले आफ्नो नियमित
कार्यक्रमअन्तर्गत गरेको कार्यक्रममा समालोचक डा. नेत्र एटमले सत्यम्को परिचर्चा
गरेका थिए । डा. एटमले कथकारले अनुभव र स्मृतिको संयोजन गरेर कथा लेखेकाले कथा
जीवन्त बनेको धारणा राखे । कथाकारले अवलोकन, अन्तरक्रिया र अभिलेखलाई सामग्री
सङ्कलनको पद्धति बनाउने गरेको बताउँदै त्रिभुवन विश्वविद्यालयका सहप्राध्याकसमेत
रहेका एटमले सत्यम्का कथामा अवलोकनलाई अधिक महत्त्व दिइएको बताए । कथाले सांस्कृतिक
पक्षलाई कथामा समेट्न सक्नु सङ्ग्रहको बलियो पक्ष भएको उनको भनाइ थियो ।
सोसाइटीका अध्यक्ष दीपक पराजुलीको अध्यक्षतामा
भएको कार्यक्रममा साहित्यकार सरुभक्तले कथाकार वियोगीका कथाले जनमानसलाई छुने
सक्ने सामर्थ्य राख्ने बताए । उनले र्यान्डम रिडर्स सोसाइटीले गर्ने बौद्धिक
बहसको एउटा सुन्दर शृङ्खलामा सहभागी हुन पाएकामा खुसी व्यक्त गरे ।
कार्यक्रममा कथाकार लक्ष्मण वियोगीले आफूले
जीवनका विभिन्न मोडमा देखेका र भोगेका विषषयवस्तुलाई कथामा उतारेको अनुभव सुनाए ।
उनले कतिपय कथालाई आफूले न्याय गर्न नसेको स्वीकार गर्दै अनुभवलाई कलाको लेपन लगाएर
आफूले कथाको स्वरूप तयार पारेको बताए । १५
ओटा कथा समेटिएको ‘सत्यम्’ वियोगीको पहिलो कथा सङ्ग्रह हो ।
सोसाइटीका सदस्य खिम लामिछाने ‘काजी’को सञ्चालनमा भएको
कार्यक्रममा साहित्यकार सरस्वती प्रतीक्षा र सुरज पौडेलले टिप्पणी गरेका थिए ।
सोसाइटीले हरेक महिनाको अन्तिम शनिवार कुनै पुस्तक वा
विषयमाथि परिचर्चा गर्दै आएको छ ।
