कुमुदिनी होम्समा प्रथम एस्.ई.ई. कप सुरु

 

पोखरा । पोखरा ४ गैह्रापाटनमा रहेको प्रतिष्ठित विद्यालय कुमुदिनी होम्समा एसइई दिएर बसेका विभिन्न जिल्लाका ७१ विद्यालयका विद्यार्थीहरुबीच प्रथम एसइई कप २०८१ मंगलबारबाट सुरू भएको छ ।

प्रतियोगितामा फुटसल तथा बास्केटबल खेल समावेश गरिएको छ । बास्केलबल कुमुदिनी विद्यालयकै बास्केटबल कोर्टमा भईरहेको छ भने फुटसल गणेश टोलमा रहेको वि - फिट फुटसलमा खेलाईँदैछ ।

विद्यालयका संस्थापक अध्यक्ष अशोक पालिखेले एसइई दिएर बसेका विद्यार्थीहरुलाई समय खेर नफाल्न, सौहार्दता बढाउन तथा एकापसमा हेलमेलको मैत्रीपूर्ण वातावरण बनाउन प्रतियोगिता आयोजना गरिएको बताए ।

पालिखेले विद्यार्थीलाई पढाईको साथसाथै अतिरिक्त क्रियाकलापमा पनि घुलमिल गराउन अत्यन्त आवश्यक भएको बताउँदै खेलकुदको माध्यमबाट एकापसमा परिचय गराउनु पनि रहेको बताए ।

प्रतियोगितामा काठमाडौं, स्याङ्जा, लमजुङ, म्याग्दी लगायतका जिल्लाहरुबाट ७१ विद्यालयका छात्रहरू फुटसलमा सहभागी भएका छन् ।  बास्केटबलतर्फ ४३ विद्यालयका छात्रहरू  सहभागी भएका छन् भने छात्रातर्फ ११ विद्यालयका विद्यार्थीहरू सहभागी भएका कुरा पालिखेले जानकारी दिए ।

फुटसलमा विजेता टोलीले नगद १५ हजार, ट्रफि, मेडल र प्रमाण पत्र पाउने छन् । दोश्रोले रुपैयाँ १० हजार तथा तेस्रोले रुपैयाँ ५ हजार पाउने छन् ।

बास्केटबल तर्फ पुरुष विजेताले रुपैयाँ १५ हजार, दोश्रोले रुपैयाँ १० हजार र तेश्रोले रूपैयाँ ५ हजार, महिला तर्फ पनि पहिलो, दोश्रो र तेस्रो हुने क्रमश: रुपियाँ १५ हजार, रुपैयाँ १० हजार र रुपैयाँ ५ हजार, ट्रफि, मेडल र प्रमाण पत्र पाउनेछन् ।

कार्यक्रमको पोखरा महानगरपालिका वडा नं ४ का अध्यक्ष देवकृष्ण पराजुलीले रेफ्रीलाई बल हस्तान्तरण गरी उद्घाटन गरेका थिए ।

सो अवसरमा उनले विद्यार्थीको पढाईको साथमा विद्यालयले विद्यार्थीलाई अतिरिक्त क्रियाकलापमा सहभागी गराउनु सबैका लागि उदाहरणीय विषय भएको बताए ।

कार्यक्रममा प्रतियोगिताका संयोजक तथा व्यवस्थापन संकाय संयोजक विकास ढुङ्गानाले प्रतियोगितामा सहभागी खेलाडी सबैलाई आभार व्यक्त गर्दै अनुशासित भएर प्रतियोगितामा सरिक भई उत्कृष्ट खेल खेल्न अनुरोध गरे ।

विद्यालय व्यवस्थापन समितिका सदस्य राज बहादुर गुरुङले विभिन्न जिल्लाका ७१ विद्यालयका विद्यार्थीलाई प्रतियोगितामा सरिक गराई सौहार्दपूर्ण वातावरण बनाएकोमा विद्यालयको प्रशंसा गरे ।

उनले अनुशासन खेलको महत्वपूर्ण पाटो रहेकोले सो अनुसार खेल खेल्न अनुरोध गरे । उद्घाटन समारोहको कार्यक्रम विद्यालयका शिक्षक सुरेन्द्र सदिच्छाले सञ्चालन गरेका थिए । मंगलबार भएका खेलहरूमा २५ विद्यालय दोस्रो चरणमा प्रवेश गरेका छन् । पहिलो दिनको दोस्रो चरणमा प्रवेश गरेका टिमहरूमा छात्रा बास्केटबलतर्फ कुमुदिनी होम्स मा.वि. र विन्देश्वरी आदर्श मा.वि. , छात्र बास्केटबलतर्फ पाँच विद्यालय र फुटसलतर्फ १८ वटा विद्यालय दोस्रो चरणमा प्रवेश गरेका छन् ।

जनप्रकाश मा.वि. र बालप्रभात बोडिङ स्कुल बिच भएको खेलमा जनप्रकाशका सुवाश सुनारले चार र सोही विद्यालयाका सुजन वि.क.ले तीन गोल गरेका थिए ।