स्याङ्जा, असोज २२ गते । विद्यार्थीहरूको सिर्जनशील विकासका लागि मध्यनजर राखी दहथुम माध्यमिक विद्यालयले आयोजना गर्दै आएको ‘विद्यार्थीसँग साहित्यकार कार्यक्रम’ सम्पन्न भएको छ । ११ र १२ कक्षामा अध्ययनरत विद्यार्थीबिच पत्रकार तथा साहित्यकार लक्ष्मण वियोगीसँग बुधबार अनौपचारिक सिर्जनशील एवम् साहित्यिक अन्तरक्रिया सम्पन्न गरेको हो ।
कवि/साहित्यकार मिलन
समीरले सहजीकरण गरेको कार्यक्रममा वियोगीले झण्डै दुई दशक लामो पत्रकारिताको सिकाइ, ऊर्जा पत्रकारिता तथा पर्यावरणीय लेखन एवम् सिर्जनाका विविध पाटाहरूका
बारेमा आफ्ना अनुभव सुनाएका थिए । सिर्जना एवम् सिकाइका लागि खुला र स्वतन्त्र
पारिवारिक तथा सामाजिक परिवेश अपरिहार्य रहेको भन्दै उनले त्यस्तो सामाजिक
संरचनामा विद्यार्थीको सिर्जनशीलताको प्रचुर विकास हुन सक्ने बताए ।
गत जेठमा मात्र
वियोगीको १५ वटा कथा सङ्ग्रहीत सत्यम् कथासङ्ग्रह बजारमा आएको छ । उनले पत्रकारितासँगै
निबन्ध,
नियात्रा, संस्मरण, गीत
तथा कवितामा समेत कमल चलाउँदै आएका छन् ।
कार्यक्रममा विद्यालयका
शिक्षक शेषकान्त खनालले स्वागत मन्तव्य राखेका थिए भने सहायक प्रधानाध्यापक
टोलप्रसाद रेग्मीले साहित्यकारसँग हुने यस्ता परामर्श एवम् अनौपचारिक छलफलले
विद्यार्थीहरूको सिकाइको दायरा फराकिलो हुने बताए । यस्तै, कार्यक्रममा शिक्षकहरू भूपेन कोइराला तथा बाबुराम बस्नेतले
विद्यार्थीहरूको सर्वाङ्गिण विकासलाई मनन् गर्दैै आगामी दिनमा विद्यालयले यस्ता
अनौपचारिक कार्यक्रमलाई निरन्तरता दिने बताए ।
यसैगरी, कार्यक्रममा मौन आवाज निबन्धकृति र सेतो सुनखानीबाबु कविता कृतिका सर्जक
एवम् साहित्यकार शम्भु अर्यालले आफ्ना केही सिर्जना वाचन गरेका थिए । सहजकर्ताको
भूमिकासँगै कवि मिलनले आफ्ना सिर्जना वाचन गरेका थिए । अन्तरक्रियामा करिब दुई
दर्जन विद्यार्थीको सहभागिता थियो ।
