पोखरा, जेठ १५ गते । पाठ्यक्रम विकास केन्द्र, सानोठिमी, भक्तपुरले विद्यालय तहका पाठ्यक्रम तथा पाठ्यपुस्तकको गुणस्तर सुधारका लागि सरोकारवालासँग अन्तरक्रिया कार्यक्रम पोखरामा सम्पन्न गरेको छ ।
जेठ
१४ र १५ गते गरी दुई दिनसम्म भएको अन्तरक्रियामा कास्कीका विभिन्न विषयगत शिक्षक,
विद्यार्थी, प्रधानाध्यापक, शिक्षा विकास तथा समन्वय एकाइका प्रतिनिधिलगायतको
सहभागिता रहेको थियो । कार्यक्रममा पाठ्यक्रम विकास केन्द्रका निर्देशक नवीनकुमार
खड्काले पाठ्यक्रम र पाठ्यपुस्तकको हालको अवस्था र तिनलाई निर्देशित गर्ने
दर्शनहरूबारे प्रकाश पारेका थिए । उनले पाठ्यक्रम र पाठ्यपुस्तक परिमार्जनका लागि
पाठ्यक्रम विकास केन्द्रले सरोकारवालाबाट वस्तुगत सुझावको अपेक्षा गरेको जानकारी
दिए ।
केन्द्रका
अर्का निर्देशक पुरुषोत्तम घिमिरेले विद्यालय शिक्षाको राष्ट्रिय पाठ्यक्रम
प्रारूप २०७६ माथि प्रकाश पार्दै यसको परिमार्जनको प्रक्रियामा केन्द्र रहेको
जानकारी दिए । उनले प्रारूपको समयसापेक्ष परिमार्जनका लागि कार्यान्वयन तहबाटै
सुझाव सङ्कलन गरिरहेको बताए ।
पाठ्यक्रम
अधिकृत विजयकुमार रानाभाटले पाठ्यक्रम निर्माण, विकास र परिमार्जनको प्रक्रियाबारे
प्रकाश पारेका थिए । उनले शिक्षकहरूले विषयगत रूपमा दिएका जुनसुकै सुझावलाई
केन्द्रले सधैँ सम्बोधन गर्ने प्रतिबद्धतासमेत जनाए । पाठ्यक्रम तथा पाठ्यपुस्तक
समयानुकूल परिवर्तन र परिमार्जन गरिने बताउँदै रानाभाटले समय समयमा यो कार्य
केन्द्रले गर्दै आएको बताए । अर्का पाठ्यक्रम अधिकृत कुमार घिमिरेले सहभागीबाट
प्राप्त सुझावबारे अन्तरक्रिया सञ्चालन गरेका थिए ।
सो
अवसरमा सहभागीहरूले व्यक्तिगत तथा सामूहिक रूपमा नीतिगत व्यवस्था, समन्वय,
व्यवस्थापन, तहगत पाठ्यक्रम र पाठ्यपुस्तक, सिर्जना/परियोजना कार्य, सूचना तथा
सञ्चार प्रविधिलगायतका विषयमा सुझाव प्रस्तुत गरेका थिए । सामूहिक प्रस्तुतिमा
रामबाबु पौडेल, खगेन्द्र बराल, माया थापा र मणिराज परियारले आआफ्नो समूहको
प्रस्तुति राखेका थिए । समग्र कार्यक्रमबारे रुपिन्द्र प्रभावीले समीक्षा गरेका
थिए ।
