पोखरा, मङ्सिर १८ गते । हेमजामा हुन लागेको प्रथम साहित्य महोत्सवको तयारी पूरा भएको छ । मूल आयोजक समितिका अध्यक्ष शङ्करमणि त्रिपाठी ‘छन्दमणि’ का अनुसार विभिन्न उपसमितिले आआफ्नो तयारी पूरा गरेका छन् । महोत्सव मङ्सिर १९ र २० गते हेमजाको ज्ञानसागर एकेडेमीमा हुने छ ।
विशुद्ध मौलिक साहित्य
महोत्सवका रूपमा रहेको यो महोत्सवमा कास्की जिल्लाबाहिरबाट १ सय बढी साहित्यकार र
एउटै मञ्चमा देखा पर्ने छन् । दुईदिने महोत्सवमा देशभरका चर्चित कवि, लेखक, कलाकार तथा स्रष्टाहरूको उपस्थिति रहने छ ।
‘मौलिक पहिचानको
संरक्षण र संवर्धन गर्ने उद्देश्यका साथ आयोजना गरिएको यो महोत्सवमा देशभरका
प्रख्यात साहित्यकार एउटै मञ्च देख्न पाइने छ’ संयोजक छन्दमणिले भने, ‘साहित्यका बारेमा जानकारी लिन र साहित्यको स्वाद लिन यो महोत्सव
नछुटाउनुहोला ।’
हेमजामा पहिलो पटक
आयोजना गरिएको हेमजा साहित्य महोत्सवमा १९ गते साहित्यका कार्यक्रम र २० गते कविवर
मुकुन्दशरण उपाध्याय रथारोहण एवम् अभिनन्दन कार्यक्रम रहेको मूल आयोजक समितिका
महासचिव शिव त्रिपाठीले जानकारी दिए ।
महोत्सवको १९ गते
जिल्लाबाहिरबाट आएका साहित्यकारले आआफ्ना सिर्जना प्रस्तुत गर्ने छन् । जसअन्तर्गत
कविता,
गीत, गजल, मुक्तक लघुकथा
वाचन रहने छ भने नाटक तथा रङ्गमञ्च, महाकाव्य लेखन, आख्यान लेखनसम्बन्धी परिसंवाद कार्यक्रम रहेको त्रिपाठीले जानकारी दिए ।
साहित्य, संस्कृति र समग्र हेमजाको पहिचान दिलाउने उद्देश्यले आयोजना गरिएको यो
कार्यक्रम सफल बनाउन स्थानीय समुदाय, साहित्यिक संस्था,
विद्यालय तथा स्वयम्सेवी समूहहरूको सहयोग रहेको उनले जानकारी दिए ।
विशेष गरी साहित्य, संस्कृतिचेतना र काव्यिक योगदानका आधारमा कविवर मुकुन्दशरण उपाध्यायलाई
रथारोहणसहित अभिनन्दन गर्ने कार्यक्रम महोत्सवको मुख्य आकर्षण बनेको छ । रथारोहण
कार्यक्रममा कविवर उपाध्यायको साहित्यिक यात्राका महत्त्वपूर्ण पक्षहरू प्रस्तुत
गरिएको सांस्कृतिक झाँकीसहित विविध प्रस्तुतिहरूसमेत रहने संयोजक त्रिपाठीले
जानकारी दिए ।
महोत्सवका क्रममा कविता
वाचन,
पुस्तक विमोचन, साहित्यिक परिसंवाद, सांस्कृतिक प्रस्तुति तथा स्थानीय कला–संस्कृतिको प्रदर्शनीसमेत हुने छ ।
दुई दिनसम्म हेमजामा
आयोजना हुने यो कार्यक्रम नेपालको साहित्यिक क्षेत्रमा महत्त्वपूर्ण सावित हुने
विश्वास आयोजकले लिएको छ ।
